MWELEKEO mpya wa siasa za majukwaani za Chama Cha Mapinduzi
(CCM) katika kampeni za
uchaguzi mkuu wa mwaka 2020 wa kujitenga na siasa za
mipasho na matusi dhidi ya wapinzani unaonekana kupokelewa vema na watanzania
wengi wakiwemo wafuasi na mashabiki na vyama vya upinzani.
Ukweli huo umethibitika katika tathimini ya awali ya
mwenendo wa kampeni za uchaguzi mkuu, siku kumi za mwanzo ambapo maelfu ya
watanzania wamekuwa wakifurika katika mikutano ya kampeni ya makada wa chama
hicho wa ngazi mbalimbali, huku wengine
wakilazimika kusimama juani kwa saa nyingi kusubiri kusikiliza hotuba za
wagombea.
Tangu kuzinduliwa kwa kampeni za chama hicho na Mwenyekiti
wake, Rais John Pombe Magufuli, Septemba 29, 2020 katika uwanja wa Jamhuri
mkoani Dodoma, ambaye hotuba yake ilijikita kunadi ilani na kuomba kura,
wafuatiliaji wa mambo ya siasa na wananchi wa kawaida walionekana kuvutiwa na
staili hiyo ya Rais Dk. Pombe kupuuza mashambulizi ya maneno machafu na matusi
ambayo amekuwa akielekezewa na baadhi ya washindani wake.
Hotuba hiyo ya Septemba 29 ya Rais Dk. Pombe ambayo ilikuwa
ikifuatiliwa na mamilioni ya watanzania kupitia vyombo mbalimbali vya habari
vya ndani na nje ya nchi ulimwenguni kote, imeacha taswira ya kile ambacho wagombea
wa chama hicho wanapaswa kujikita katika kampeni zao.
Ni kwa kufuata taswira hiyo
wagombea wa CCM sasa wanaonekana kuwa na mvuto zaidi kwa wananchi
wanaovutiwa na utamaduni mpya wa CCM wa kujitenga na laana ya mdomo na kujikita
kuhubiri ilani ya chama chao na kuomba kura huku kibwagizo chao kikiwa
kudumisha amani, umoja na mshikamano.
Alfred Dimoso, mmoja wa mashabiki wa CCM aliyefanya
mahojiano na Tanzania PANORAMA Blog.Spot mapema wiki hii jijini Dodoma, alisema
CCM ambacho hapo awali baadhi ya makada wake walikuwa na sifa mbaya ya kupiga
vijembe na kutoa maneno machafu wanasiasa wanaoshindana nacho sasa wanaonekana
kuzaliwa upya au kubatizwa upya.
"Yule mzee Yusuf Makamba alisema kweli ujue. Rais Pombe
amewabatiza wana CCM kwa moto, sasa ni watakatifu, kila mtanzania ana hamu ya
kuwasikiliza. Yaani ni mwendo wa sera, kunadi ilani yao na kuomba kura. Hakuna
matusi wala vijembe. Hata ukiwa na mwanao unakwenda kwenye mikutano yao bila
wasiwasi.
"Zamani makada wa chama hicho walikuwa wanashambuliana wenyewe
kwa maneno ya kashfa na kejeli na hivyo kuwapa nafasi washandani wao
kuwang'ong'a kwa kukosa sera na kushindwa kuinadi ilani yao ya uchaguzi kwa
wapiga kura na wananchi, hayo yote sasa yanaonekana kuwa historia.
"We hushangai hivi sasa hata wagombea ubunge na udiwani ni magwiji wa
kuinadi ilani ya chama chao tena kwa kumwanga takwimu za utekelezaji wa ilani
inayokwisha na nini kitafanyika katika ilani mpya. Lakini zaidi ni mahubiri ya
wagombea wa chama hicho ya amani, umoja, mshikamano, Maendeleo hayana chama,
yanayotolewa kwa lugha ya upole na unyenyekevu yamewafanya wao na chama chao
kuwa na mvuto mkubwa wa kisiasa dhidi ya washindani nao," alisema Dimoso.
Mwingine aliyehojiwa na kutoa maoni yake kuhusu CCM na
makada wake kujiumba upya ni Jumanne Abdul, mkazi wa Muheza mkoani Tanga
anayejishughulisha na biashara ndogo aliyesema uzinduzi wa kampeni za CCM katika uwanja wa Jamhuri
jijini Dodoma pia umekuja na neema kwa wafanyabiashara wadogo maarufu kwa jina
la machinga.
"Mimi ni mpiga picha wa kujitegemea, ni machinga.
Nimetokea Tanga kuja kwenye huu uzinduzi wa kampeni kwa sababu hizi kampeni za
wana CCM zina mambo ya ziada, ni fursa ya biashara kwetu. Kwanza ni kampeni
ambazo zimeratibiwa vizuri sana, hakuna fujo, kuna burudani ya wasanii wote maarufu
nchini na viongozi wote wakiwemo wastaafu wapo hapa.
"Mkutano huu ni tofauti kabisa na ya wanasiasa
wengine. Hapa wapiga kura wanaondoka
wakiwa wameelewa somo siyo matusi na kejeli," alisema Abdul.
(Tanzania PANORAMA Blog itaanza kufanya uchambuzi
wa ilani za uchaguzi za vyama vya siasa vinavyoshiriki uchaguzi mkuu wa Oktoba
2020 wiki hii. Karibu twende pamoja.
